Tiener oorleef nege weke in die wildernis

2013-01-28 10:19

Sydney – ‘n Australiese tiener wat meer as twee maande gelede van sy huis in Sydney verdwyn het, is uitgeteer, uitgeput en vol bloedsuiers in ‘n bos noord van die stad gevind, het die polisie Maandag gesê.

Matthew Allen se familie het die ergste gevrees nadat die 18-jarige laat in November uit Westleigh, naby Cherrybrook in die noordooste van Sydney, verdwyn het. Sy selfoon en bankrekeninge is onaangeraak gelaat.

Uitgebreide soektogte deur die polisie in die gebied het niks bereik nie. Allen ly aan ‘n onbekende mediese toestand.

Twee stappers het die tiener Saterdag gesien waar hy in bosse, minder as twee kilometer van sy huis, gelê het. Hy was met bloedsuiers bedek en het byna die helfte van sy liggaamsgewig verloor. Hy het oral op sy lyf insekbyte gehad.

Allen was gedeeltelik blind, en het gangreen aan sy onderbene en voete gehad. Die polisie sê hulle kan nie glo hy het oorleef nie.

“Hy was geheel en al uitgeput, ontwater en het baie gewig, tot 50%, verloor. Hy was gedeeltelik blind en hy het bloedsuiers oral oor sy lyf gehad,” het Glyn Baker, waarnemende polisie-inspekteur, gesê.

“Hy het geen skuilplek gehad om in te bly nie en was blootgestel aan die weer sedert hy vermis geraak het,” het hy bygevoeg.

Allen het glo met opset weggekruip in die gebied, wat gereeld deur stappers besoek word.

Hy het aan reddingswerkers gesê hy het oorleef deur water te drink uit ‘n plaaslike stroompie, wat amper droog was toe hy gevind is. Hy het in onlangse weke baie hoë temperature, insluitend ‘n rekord van 46 grade Celsius in Sydney, oorleef.

Hy is per helikopter na ‘n hospitaal geneem om behandeling te ontvang.

“Sy familie is baie bly dat hy veilig en gesond is,” het Baker gesê.

– Volg Nuus24 op Twitter

 

- Sapa - AFP