Tibettaan dood ná hy homself aan die brand steek

2012-03-28 12:00

Nieu-Delhi – ‘n Tibettaan wat homself twee dae gelede in Nieu-Delhi aan die brand gesteek het, het Woensdag aan sy beserings beswyk, het ‘n aktivis gesê.

Jamphel Yeshi  (27) het homself aan die brand gesteek in opstand teen pres. Hu Jintao van China se besoek aan Indië.

Yeshi het petrol oor homself gegooi en homself daarna aan die brand gesteek. Hy het in die straat af gehardloop en geskree, terwyl sy liggaam in vlamme gehul was.

Hy het op die grond neergeval terwyl ander Tibettane, wat ook aan die betoging deelgeneem het, die vlamme probeer uitslaan het.

Dokters het Yeshi se brandwonde as baie ernstig beskryf en het gesê sy kanse op oorlewing is baie skraal.

Sonam Lepcha, ‘n mede-aktivis, het telefonies vanuit die hospitaal gesê ‘n dokter het Woensdag gesê Yechi is dood.

President Hu sou na verwagting Woensdagmiddag in Delhi land om Donderdag se beraad van die BRICS-groep van ontwikkelende lande by te woon.

– Volg Nuus24 op Twitter
 

- AFP