Thailand se koning behandel vir bloeding op brein

2012-07-13 21:52

Bangkok – Thailand se koning, die monarg wat al die langste in die wêreld aan bewind is, is in die hospitaal waar hy reeds sedert 2009 woon, behandel vir ligte bloeding op die brein, het die paleis Vrydag gesê.

Koning Bhumibol Adulyadej se hartklop en bloeddruk het teruggekeer na normaal ná die voorval. Dokters het hom egter aangeraai om openbare aktiwiteite vir tyd en wyl te staak, het die paleis in ‘n verklaring gesê.

‘n Span dokters het die 84-jarige monarg Donderdagaand behandel nadat hy ondersoek is vir “spasmas in sy regterhand” en ‘n “effens vinniger hartklop”.

“Dokters het x-strale geneem om sy brein te ondersoek en het gevind ‘n klein hoeveelheid bloed het deur die harsingvlies beweeg,” het die verklaring gesê

Die koning is met “binneaarse medikasie behandel, waarna die spasma gestop het”.

Die koning is in September 2009 in die hospitaal opgeneem vir behandeling van ‘n asemhalingprobleem.

Die koning het die troon al in 1946 bestyg.

– Volg Nuus24 op Twitter
 

- Sapa - AFP