Thailand: Oudpremier staan tereg op moord
2012-12-13 14:43
Bangkok – 'n Saak van moord is Donderdag amptelik teen Abhisit Vejjajiva, die voormalige premier van Thailand, aanhangig gemaak in verband met die dood van ‘n landsburger tydens teenregeringsbetogings twee jaar gelede.
Abhisit is saam met Suthep Thaugsuban, sy destydse adjunk, van moord aangekla.
Honderde polisiebeamptes het buite die gebou van die departement van justisie, waar die saak teen hom geopen is, gewaak uit vrees dat betogings weer kan opvlam.
Sowat 90 mense is dood en 1 900 beseer toe teenregeringsbetogers in Mei 2010 met sekerheidsmagte gebots het.
Die klagte teen Abhisit, wat in daardie stadium premier was, hou verband met die skietdood van 'n taxi-bestuurder, Phan Kamkong.
Die besluit om Abhisit en sy voormalige adjunk te vervolg is geneem ná ‘n hof in September beslis het dat Phan deur die weermag doodgeskiet is.
Abhisit het in reaksie gesê die saak is polities gemotiveerd.
Meer as 100 000 mense het in 2010 aan die betogings deelgeneem.
– Volg Nuus24 op Twitter
- Sapa - AFP
