Thailand: Elfjarige sterf in hinderlaag

2012-11-01 08:31

Bangkok – 'n Elfjarige seun is onder die ses mense wat in skietaanvalle in die suide van Thailand dood is, het die plaaslike polisie Donderdag gesê.

Twee militante is Woensdag dood en twee polisiebeamptes is gewond tydens 'n skietery by 'n huis in die Raman-distrik. Kort daarna is 'n 65-jarige man en sy 11-jarige seun deur ongeïdentifiseerde aanvallers in 'n hinderlaag gelei en doodgeskiet.

"Die man se negejarige seun is ook in die aanval gewond en in 'n kritieke toestand in die hospitaal," het die polisie in 'n verklaring gesê.

Raman is 'n rebellevesting waar sekuriteitsbeamptes of inwoners wat met Thaise owerhede saamwerk, gereeld geteiken word.

Twee Boeddhiste, 'n 28-jarige vrou en 'n 47-jarige man, is ook Woensdag dood toe militante op 'n groep mense by 'n fees in die Pattani-provinsie losgebrand het.

Die sterftes was deel van nog 'n grusame dag in Thailand se agt jaar lange rebellie, wat reeds die lewe van 5 300 mense in die koningkryk se suidelike Pattani-, Yala- en Narathiwat-provinsies geëis het.

Die rebelle veg teen die Thaise regering se diskriminasie teen etniese Maleisiese Moslems en beweerde mensregte-skendings deur die weermag.

Volg Nuus24 op Twitter.

- Sapa - AFP