Thai-betogers sal onderhandel
2010-05-05 04:49
Bangkok – Thailand se “Rooi-hemp”-betogers het Dinsdag ooreengekom om te probeer om hul verskille met die regering uit te werk en om sodoende nog sterftes te voorkom.
Dit bring hoop dat die stresvolle krisis wat 27 lewens geëis het tot ‘n einde sal kom.
Tog het die “Rooi-hemde” gesê dat hulle nog nie hul massa-betoging in Bangkok se middestad gaan beëindig nie.
Hulle vereis dat eerste minister Abhisit Vejjajiva dit moet duidelik maak wanneer hy beplan om die parlement te ontbind vir verkiesings en om sy troepe terug te trek.
“Leiers van die “Rooi-hemde” het ooreengekom om deel te word van die versoeningsplan wat deur die eerste minister voorgestel is om ‘n verdere verlies van lewens te voorkom,” het hul leier Veera Musikapong aangekondig.
Abhisit het Maandag in ‘n nasionale toespraak gesê dat hy gereed was om verkiesings in die middel van November te hou as alle partye sy versoeningsplan aanvaar.
Die betogers het gesê dat die eerste minister dit moet duidelik maak wanneer hy die parlement sal ontbind en dit aan die verkiesings-kommissie moet oorlaat om die verkiesingsdatum vas te stel..
Ons sal voortgaan met die betoging totdat Abhisit duidelik sê wanneer hy die parlement gaan ontbind. Dan sal ons ons volgende skuif bepaal,” het ‘n ander leier, Jatuporn Prompan, aan verslaggewers gesê.
“Versoening moet bereik word deur volkome vryheid en nie deur intimidasie en die gebruik van mag nie,” het hy gesê.
- Sapa - AFP
Volg Nuus24 op Twitter