Texas: Twee sterf ná 140 motors bots

2012-11-23 08:27

Beaumont – Twee mense is dood en meer as 80 beseer toe meer as 140 motors op ‘n hoofweg in Texas gebots het, het die polisie gesê.

Die hoofweg was glo oortrek met digte mis.

“Dit is katastrofies. Ek het motors bo-op motors,” het Rod Carroll, ‘n polisiebeampte, Donderdag gesê.

Die ongeluk het sowat 128 km oos van Houston plaasgevind.

Carroll het gesê tussen 80 en 90 mense is na hospitale geneem vir behandeling. Tussen 10 en 12 mense het kritieke beserings opgedoen. Meer as 140 voertuie was in die ongeluk betrokke.

Volgens Carroll was die mis so dig dat die polisie eers nie agtergekom het dat hulle met verskeie ongelukke besig is nie.

Bestuurders wat nie beseer is nie, het volgens berigte gehelp om die beseerdes uit die wrakke te help.

– Volg Nuus24 op Twitter
 

- Sapa - AP