Tenks ontplooi in Kaïro

2012-12-06 14:28

Kaïro – Egipte se weermag het Donderdag tenks ontplooi by die presidensële paleis in Kaïro ná gewelddadige botsings tussen ondersteuners en opponente van pres. Mohamed Morsi.

Ses mense is tydens die botsings dood.

Die geweld het Woensdag begin toe ondersteuners van Morsi tente afgebreek het wat deur die opposisie buite die presidensiële paleis opgeslaan is.

Die betogers teken protes aan teen 'n omstrede nuwe wet wat Morsi baie meer mag sal gee.

Die opposisie beskuldig ook Morsi se ondersteuners daarvan dat hulle geweld in Egipte aanhits.

Altesaam 440 mense is volgens die gesondheidsdepartement tydens die botsings beseer.

Opposisiegroepe sê dat die wette wat Morsi van krag gemaak het, ondemokraties is en dat hy wette sal goedkeur wat vroue, godsdienstige minderhede en opposisiegroepe ondermyn.

Dit is die eerste keer sedert die opstande wat Hosni Mubarak se regering omver gewerp het, wat die weermag by betogings moes ingryp.

Altesaam sewe van Morsi se raadgewers het bedank in protes teen die nuwe wet.

– Volg Nuus24 op Twitter
 

- Sapa-DPA