Te Koop: Twee spoke
2010-03-09 10:36
Wellington – Twee glasflesse, elk met ‘n spook in, is gedurende 'n veiling via die internet in Nieu-Seeland vir sowat $2000 (R14860) verkoop.
Die twee spoke is na bewering ‘n ou man en ‘n jong meisie.
Daar is Dinsdag, kort na die veiling bevestig dat 'n anti-rook onderneming in Nieu-Seeland die gebottelde spoke gekoop het.
Die webwerf, Trademe wat die veiling behartig het, het egter ‘n anonieme bieër se aanbod van $5000 (R37 150) van die hand gewys.
Avie Woodbury van die dorp, Christchurch, het gesê sy het die gebottelde geeste as te koop beskikbaar gestel nadat ‘n geestesbesweerder van 'n kerk, twee spoke in haar huis gevang het en in twee glasflesse vol “heilige water” geplaas het.
Die geeste is glo opgeroep met die hulp van n Ouija-bord. Na bewering het die ou man, genaamd Les Graham, in 1920 in die huis gesterf en behoort die ander gees aan ‘n magtige en versteurde jong meisie.
Woodbury het gesê die spoke het haar eetlus en slaappatrone versteur.
"Ek het oomblikke ervaar waar die ketel vanself begin kook het, 'n gevattery op my rug, stemme wat van ander kamers gehoor is en items wat weggeraak het en weer op snaakse plekke gevind is,” het sy gesê.
"Die hond was mal, hy wou nie in sekere kamers ingegaan het nie. My broer se dogter het by my kom bly en vir my vertel dat sy met die jong meisie gepraat het.”
"Ons het geen verdere aktiwiteite ervaar sedert hulle op 15 Julie in die bottels vasgevang is nie.
Die veiling het baie reaksie uitgelok. Een man het aanlyn kommentaar gelewer wat beweer het dat hy aan veelvuldige persoonlikhede ly weens twee gebottelde geeste. "Ek dink hulle name is Jim Beam en Johnnie Walker," het hy gesê.
-Sapa-AFP