Taylor-appèl begin

2013-01-22 11:47

Den Haag – Aanklaers en prokureurs wat die voormalige Liberiese krygsheer Charles Taylor verdedig, sal Dinsdag begin met 'n appèlsaak teen sy vonnis.

Taylor is in die Spesiale Hof vir Sierra Leone tot 50 jaar tronkstraf gevonnis weens sy rol in die land se wrede burgeroorlog.

Regters sal argumente van beide kante aanhoor. Aanklaers sal na verwagting vra dat hy ‘n swaarder vonnis opgelê word, terwyl sy prokureurs sal vra dat sy vonnis afgewys of aangepas word.

Die sitting sal om 10:00 (09:00 GMT) by die hof se hoofkwartier in Leidschendam buite Den Haag afskop.

Die saak sal na verwagting oorheers word deur komplekse regsargumente – met beide partye wat sal aanvoer dat regters foute gemaak het toe hulle Taylor in April verlede jaar skuldig bevind en in Mei gevonnis het.

Die 64-jarige Taylor se vonnis van 50 jaar vir “sommige van die wreedste misdade in menseheugenis” is destyds oor die wêreld heen verwelkom.

Regters het gesê hy het rebellemagte wat tydens Sierra Leone se 10 jaar lange burgeroorlog teen Freetown geveg het, gehelp. Die oorlog was bekend vir verminkings, bedwelmde kindersoldate en seksslawe.

Regters het ook gevind dat Taylor in “bloeddiamante” betaal is wat deur slawe ontgin is in gebiede wat onder die beheer was van rebelle van Sierra Leone.

Die geskiedkundige vonnis was die eerste wat in ‘n internasionale hof aan ‘n voormalige staatshoof opgelê is sedert die Nazi-verhore by Nuremberg in 1946.

– Volg Nuus24 op Twitter

 

- Sapa - AFP