Talle sterf tydens geweld in Sirië
2011-10-10 14:53
Damaskus – Minstens 14 burgerlikes en 17 weermag- en veiligheidspersoneellede het oornag in Sirië gesterf nadat geweld oor die hele land heen uitgebreek het, het aktiviste en die staatsmedia Maandag berig.
Daar word berig dat geweld opgevlam het toe veiligheidsmagte hul harde optrede teen betogers voortgesit het.
Die burgerlikes het in die provinsies van Hons en Idlib gesterf toe veiligheidsmagte oornag op hul betogings in beide streke geskiet het, het aktiviste in Libanon aan die nuusagentskap dpa gesê.
Sirië se staatstelevisie berig “gewapende bendes” het 17 veiligheidspersoneellede doodgemaak en talle ander in Hama, Homs en Idlib gewond.
Volgens die Verenigde Nasies (VN) is meer as 2 900 mense, waaronder 187 kinders, in totaal in die onluste in Sirië dood.
Betogers wat aan die protesoptogte deelneem dring daarop aan dat pres. Bashar al-Assad sy amp neerlê.
Volg Nuus24 op Twitter
- Sapa-DPA