Taliban verwyt VSA vir sy aanvalle
2011-09-10 14:47
Kaboel – Die inval van Afganistan deur die VSA en sy vennote ná die terreuraanvalle van 11 September 2001 “sal ‘n permanente stigma bly op die gesigte van Westerse demokrasie”, het die Taliban Saterdag gesê.
Die Islamitiese groep, wat geweier het om die Al-Kaïda-leier Osama Bin Laden 10 jaar gelede ná die aanvalle oor te gee, het ook gesê die mense van Afganistan het “eindelose stamina vir ‘n lang oorlog” en sal “die Amerikaners na die asblik van die geskiedenis stuur”.
In ‘n lang verklaring wat in Persies en Engels uitgereik is, het die Islamic Emirate of Afghanistan gesê die aanvalle op Amerika in 2001 word onregverdig gebruik as ‘n “voorwendsel” vir die gevolglike inval van Afganistan.
“9/11 herinner Afganistan elke jaar aan ‘n gebeurtenis waarin hulle geen rl gespeel het nie, maar, deur dit as ‘n voorwendsel te gebruik, het die Amerikaanse kolonialisme tienduisende ongelukkige en onskuldige Afgane se bloed laat vloei. Die wreedaardigheid duur steeds voort,” het die verklaring gelui.
Die Taliban het ‘n beroep gedoen op ‘n “onpartydige” ondersoek in die 9/11-aanvalle, maar Amerika en sy vennote het gereageer deur “eerder missiele en giftige uraan-wapens te stuur,” het dit verder gesê.
“Dit sal ‘n permanente stigma bly op die gesig van die Westerse demokrasie dat Amerika en haar vennote tienduisende Moslems gemartel het onder die voorwendsel van hierdie duistere en slegte voorval.
“Kinders, ou mans, vroue en selfs babas wat slegs dae oud was is onder die slagoffers. Hulle het ons dorpe vernietig, plantasies verwoes en selfs informele nedersettings geteiken onder die naam van oorlog teen terreur.”
‘n Dekade se gevegte in Afganistan het begin met Operation Enduring Freedom en het so uitgekring dat daar nou sowat 140 000 troepe uit 48 lande daar veg.
Sondag is die 10de herdenking van die aanvalle op die World Trade Centre se Twin Towers in New York waarin duisende mense hul lewens verloor het.
– Volg Nuus24 op Twitter
- Sapa - AFP
