Taliban 'sal in 2014 weer mag oorneem'
2011-10-10 07:26
Den Haag - Twee onlangs afgetrede Duitse generaals het skerp kritiek uitgespreek op die wyse waarop die oorlog in Afganistan gevoer word. Tensy sake vinnig drasties verander, is die oorlog verlore, meen hulle.
Die vorige inspekteur-generaal van die Duitse weermag, die vierster-generaal Harald Kujat (die pos kom neer op die hoof van die strydmagte), het aan die Mitteldeutsche Zeitung gesê as die oogmerk was om sy solidariteit met Amerika te wys, was die Duitse deelname aan die oorlog ’n sukses.
“As die stabilisering van ’n land en ’n streek egter ons maatstaf is, het die deelname misluk.”
Hy het gesê te lank is voorgegee dat dit nie regtig om ’n oorlog gaan nie, maar slegs om ’n stabiliseringsoperasie. “Dit het te lank geduur voordat ons aanvaar het dat dit hier om ’n operasie gaan waar die vyand militêr veg en ons ook militêr moet veg. Indien ons Afganistan in 2014 verlaat, sal die Taliban die mag binne enkele maande weer oorneem.”
Nog ’n onlangs afgetrede vierster-generaal, Egon Ramms, het in ’n onderhoud aan Die Welt gesê sy bekommernis is dat daar geen oorkoepelende politieke strategie vir Afganistan is nie.
Met sy aftrede verlede jaar was hy oorhoofs in bevel van die hoofkwartier wat die Navo-bydrae aan die oorlog in dié land gekoördineer het.
Hy het onder meer gesê: “Ek vind dit ondraaglik dat daar in beginsel geen gesamentlike politieke plan vir Afganistan is wat al die instrumente wat ’n mens in Afganistan kan en moet aanwend, kan koördineer nie.”
Daar is byvoorbeeld nie voldoende samewerking tussen die militêre en burgerlike elemente van die VN in die land nie.
Intussen het ’n Duitse regeringswoordvoerder aan die koerant bevestig dat die regering hou by sy voorneme om sy deelname aan die oorlog in 2014 te beëindig.
– Volg Nuus24 op Twitter
- Die Burger