Taliban dreig om prins Harry te vermoor
2012-09-10 09:15
Kandahar – Die Taliban het Maandag gesê hy is vasbeslote om Brittanje se prins Harry te vermoor.
Die prins doen tans diensplig in Afganistan, vier jaar nadat sy vorige dienstyd daar kortgeknip is weens sekuriteitsvrese.
‘n Woordvoerder het gesê die groep het ‘n “waardevolle plan” om die derde aanspraakmaker op die kroon in die suidelike Helmand-provinsie aan te val.
“Ons sal ons bes doen om prins Harry en Brittanje se ander troepe wat in Helmand gebaseer is, te vermoor,” het die woordvoerder, wat sy naam as Zabihullah Mujahid gegee het, telefonies aan AFP gesê.
“Dit is nie vir ons belangrik om hom te ontvoer nie. Ons sal hom teiken en hom vermoor,” het hy bygevoeg.
Die 27-jarige Apache helikopter-vlieënier, wat onlangs in die nuus was nadat naakfoto’s van hom by ‘n partytjie in Las Vegas gepubliseer is, sal vier maande in Kamp Bastion in Helmand deurbring.
“Dié wie in ons land veg is ons vyand en ons sal alles moontlik doen om hom dood te maak,” het Mujahid gesê.
Brittanje sê Harry se eskader “sal toesig en afskrikking bied en sal ook, indien nodig, betrokke wees by aanvalle, of ander vliegtuie of helikopters vergesel”.
– Volg Nuus24 op Twitter
- Sapa - AFP
