Taliban brand nóg Navo-tenkwaens
2010-10-06 12:05
Miranshah, Pakistan – Die Taliban het Woensdag erken dat hulle soldate ‘n aanval op Navo-tenkwaens in Pakistan geloods het in weerwraak op ‘n Amerikaanse aanval in die noordweste van die land.
“Ons neem verantwoordelikheid vir die aanval op Navo-tenkwaens in Quetta vandag (Woensdag),” het Tehreek-e-Taliban se woordvoerder, Azam Tariq, aan AFP gesê.
“Ons sal meer aanvalle loods soos wat die militante aanvalle van die VSA op ons toeneem,” het hy bygevoeg.
Een persoon is dood toe gewapende mans ‘n terminaal in Quetta aangeval het waar tot 40 tenkwaens geparkeer was. Minstens 10 Navo-tenkwaens is aan die brand gesteek, het senior polisiebeamptes gesê.
Militante van die Taliban het verantwoordelikheid vir twee ander aanvalle die week erken waarin byna 60 vragmotors aan die brand gesteek is en drie mense dood is.
Die VSA het hul militêre veldtog in Pakistan se noordwestelike, wettelose distrik op die Afgaanse grens dramaties vergroot, waar ‘n beweerde terreurkomplot om Europese teikens aan te val glo beplan word.
Volg Nuus24 op Twitter
- Sapa - AFP