Taliban-aanvalle eis talle lewens
2010-03-12 07:16
Erika Gibson, Die Burger
Pretoria - ’n Suid-Afrikaanse veiligheidsoperateur en sy Afgaanse kollega is onder die jongste slagoffers van toenemende Taliban-gedrewe geweld in die suidooste van Afganistan.
Aubrey Acker (38) van Hartbeespoort is Woensdag doodgeskiet toe ’n voertuig met drie Taliban-militante op hom en sy span wagte losgebrand het.
’n Ingeligte het aan Beeld, susterkoerant van Die Burger, gesê Acker en sy span het werknemers van ’n Indiese padkonstruksiefirma wat ’n teerpad in die suidooste bou teen Taliban-aanvalle beskerm toe die voorval naby die Pakistan-grens gebeur het.
Acker se vrou, Marietjie, is kort ná die voorval van haar man se dood ingelig.
Acker het vroeër in Bagdad, Irak, gewerk en is ’n oudleerder van die Hillview High School in Pretoria.
Die aanval was een van verskeie deur die Taliban waarin die afgelope twee dae talle mense dood is.
Die Pakistanse nuusdiens PakTribuneberig vyf Afgaanse soldate is Woensdag dood toe ’n selfmoordbomaanvaller met ’n voertuig plofstof by ’n Afgaanse militêre basis in die suidoostelike provinsie Paktika ingery het.
’n Lading plofstof in ’n pad in die suidelike gebied Marjah het Woensdag drie burgerlikes geëis. Twee kinders het gister in ’n soortgelyke ontploffing in die noorde van die land gesterf.
’n Navo-soldaat, wie se nasionaliteit teen gisteraand nog nie bekend was nie, is gister in ’n ontploffing in die suide van die land dood.
- Die Burger