Tajikistan verhoog trou-ouderdom
2010-07-23 03:57
Tajikistan – Pres. Emomali Rahmon van Tajik het Donderdag die wettige ouderdom wanneer jong meisies mag trou van 17 na 18 verhoog, sodat hulle eers hul hoërskoolonderrig kan voltooi.
Hy het ook onthale van meer as 300 gaste by troues verbied. Sosiale druk om 1000 gaste na troues te nooi is besig om families te ruïneer, het hy gesê.
Baie ouers gee toestemming dat hul kinders op ‘n jong ouderdom mag trou.
Volgens Rahmon maak jong meisies nie hul studies klaar wanneer hulle op ‘n vroeë ouderdom trou nie.
Dit is nie bekend of Rahmon aan die loopbaan van sy 16-jarige dogter gedink het, toe hy die nuwe wet ingestel het nie.
Sarina Rahmon is in ‘n duur koshuisskool in Brittanje en is ook ‘n aanbieder op ‘n televisieprogram.
Rahmon het sewe dogters en twee seuns. Families van tot agt kinders is nie ‘n ongewone verskynsel in Tajik nie.
- Volg Nuus24 op Twitter.
- Sapa-DPA