Taiwan: Nóg tronkstraf vir korrupte oudpresident

2012-11-02 17:10

Taipei – Chen Shui-bian, Taiwan se voormalige president, wat tans 17 en ‘n half jaar tronkstraf uitdien, is nóg ‘n jaar tronkstraf opgelê vir geldwassery, en omdat hy omkoopgeld aanvaar het.

Taiwan se hooggeregshof het Donderdag beslis dat Shui-bian nou 18 en ‘n half jaar tronkstraf moet uitdien.

Shui-bian is ses maande ná sy ampstermyn, wat van 2000 tot 2008 gestrek het, in hegtenis geneem en word sedertdien vervolg vir aanklagte van bedrog en geldverduistering.

Sy eerste vonnis is in 2010 opgelê en sy tyd in die tronk word afgetel sedert hy in 2008 in aanhouding geneem is.

Shui-bian is in September van die tronk na ‘n hospitaal geskuif ná hy gekla het dat hy aan depressie ly as gevolg van die haglike toestande in die tronk.

– Volg Nuus24 op Twitter
 

- Sapa-DPA