TV-onderhoud met Woods vroeër uitgesaai
2009-12-13 07:09
Wellington – Die Nieu-Seelandse sportuitsaaier Sky TV sal Dinsdag ‘n onderhoud van 8 minute uitsaai wat onlangs in Australië opgeneem is waarin Woods oor die belangrikheid van sy vrou en familie in sy lewe.
In ‘n 30-sekonde voorprent vir die onderhoud, wat opgeneem is kort voor gerugte van buite-egtelike verhoudings aan die lig gekom het, vra Murray Deaker vir Woods: “Familie eerste, gholf tweede. Sal dit altyd so wees?” Woods antwoord dan: “Altyd.”
Die onderhoud is deur Woods se Nieu-Seelandse gholfjoggie, Steve Williams, gereël en is verlede maand in Melbourne opgeneem waar Woods die Australiese Meesterstoernooi gewen het.
Sky wou die onderhoud op Kersdag uitsaai, maar het besluit om dit Dinsdag uit te saai in die lig van onthullings oor Woods se privaatlewe.
“Ons moet bewus wees daarvan dat die onderhoud gevoer is voor dit alles opgeblaas het. En gegewe wat ons weet, sal almal hul eie gevolgtrekkings maak oor sy antwoorde,” het Deaker aan die Sunday Star-Times gesê.
- Reuters