Sy koerant se optrede 'walg' Murdoch
2011-07-20 06:51
Johannesburg - “Om telefone af te luister is verkeerd. Om polisiemanne vir inligting te betaal is verkeerd. Ek is gewalg deur ons koerant se optrede.”
Só het Rupert Murdoch (80) Dinsdag voor ’n parlementêre komitee in Londen getuig in ’n verhoor oor die grootste mediaskandaal in Brittanje se geskiedenis.
Murdoch, voorsitter van die reusagtige News Corporation (NC) en een van die rykste mans ter wêreld, het sy getuienis begin deur te sê dis die “nederigste” dag in sy lewe.
Hy en sy seun James (39), die uitvoerende hoof van NC, het hul onvoorwaardelike verskoning aan die Britse volk herhaal en aan die slagoffers van hul koerante se onwettige optrede om private telefone af te luister en stemboodskappe en SMS’e uit te wis of te wysig.
Daaronder is boodskappe op die fone van moord- en terreurslagoffers, asook dié van geliefdes van Britse soldate wat in Afganistan gesterf het.
Murdoch sr. het egter enige persoonlike aandadigheid aan en verantwoordelikheid vir die skandaal wat tot die sluiting van Brittanje se grootste Sondagkoerant, News of the World, gelei het, ontken.
“Dit is gedoen deur mense wat ek vertrou het en deur mense wat hulle op hul beurt vertrou het. Ons is verraai.”
In ’n verklaring namens hom en sy seun het hy gesê hy “voel siek” oor wat sy koerant met onskuldige mense aangevang het.
Vroeër het hy gesê: “Ons is met vuil hande betrap.
“Ons is skaam oor wat gebeur het en ons het daarom besluit om News of the World te sluit.”
Murdoch het die versekering gegee sy maatskappy gaan alles in sy vermoë doen om die skade wat die maatskappy berokken het, reg te stel.
Albei Murdochs het erken hulle het News of the World gesluit “omdat die koerant alle vertroue wat hy met sy lesers gehad het, verbreek het”.
Gevra oor sy verhouding met die huidige Britse eerste minister, David Cameron, het Murdoch sr. gesê hy is met geleenthede na 10 Downing Street, die premierswoning, genooi.
Hy het vertel hoe twee Britse eerste ministers van hom, die wêreld se invloedrykste mediabaas, verwag het om met sy gereelde besoeke by die agterdeur van 10 Downing Street aan te meld.
In antwoord op vrae oor sy politieke invloed het Murdoch sr. vertel hoe sy koerante, wat hulle in die Thatcher-era aan die Konserwatiewe Party se kant geskaar het, meer as 200 000 eksemplare aan sirkulasie verloor het toe hulle die Arbeidersparty van Tony Blair gesteun het.
– Volg Nuus24 op Twitter
- Beeld