Switserse gyselaar ná bykans 'n jaar bevry

2013-02-28 13:12

Doha – ‘n Switserse vrou wat vir byna ‘n jaar in Jemen aangehou is, is bevry en het in Katar aangekom, het die Switserse regering en die amptelike QNA-nuusagentskap Donderdag gesê.

Die vrou, wat “verlede jaar in Jemen ontvoer is, het oornag by Doha se lughawe aangekom nadat sy bevry is te danke aan bemiddeling deur Katar,” het die agentskap gesê. Meer inligting oor die omstandighede rakende haar vrylating is nie verskaf nie.

Gewapende mans het die vrou op 14 Maart 2012 uit haar huis in Hodeida in die weste van Jemen ontvoer, waar sy as ‘n taalonderwyser gewerk het.

Haar ontvoerders het haar na die suidoostelike Shabwa-provinsie geneem, waar Al-Kaïda ‘n sterk teenwoordigheid het.

Volgens ‘n woordvoerder vir Jemen se ministerie van binnelandse sake het die ontvoerders ‘n beroep op Sanaa se regering gedoen om lede van hul stam te bevry in ruil vir die vrou se vrylating.

Switserland het bevestig dat die vrou bevry is en dat sy in Doha aangekom het.

– Volg Nuus24 op Twitter

- Sapa - AFP