Swaar sneeu ontwrig Europese verkeer
2010-02-01 08:05
Leopold Scholtz
Den Haag - Groot dele van Europa is die naweek opnuut deur bittere vrieskoue en die ouma van alle sneeustorms getref. En die einde is nie in sig nie.
Berigte oor grootskaalse ontwrigting word van oor die hele Noord-, Sentraal- en Oos-Europa ontvang.
Die uiterste westelike kusstreke en Suid-Europa het slegs matige sneeu gekry.
Duitse media berig dat tot drie meter sneeu die verkeer op snelweë in die noordoostelike deelstaat Mecklenburg-Voorpommere onmoontlik gemaak het. Die owerhede het motoriste en vragmotorbestuurders wat vasgeval het, met spesiale toerusting te hulp probeer snel, maar ook dié kon nie deur die ongekende dik pak sneeu worstel nie en moes ten slotte tou opgooi.
Elders was die sneeu ’n halwe meter diep.
Oor die hele land het honderde ongelukke op die paaie plaasgevind. Minstens drie mense het gesterf en tientalle is beseer.
Bowendien moes talle mense weens gebreekte bene, arms, heupe en skouers behandel word omdat hulle op die gladde sypaadjies gegly en geval het.
Tientalle treine kon nie vertrek nie omdat die wissels op plekke vasgevries was of omdat die treine selfs teen lae snelheid nie deur die sneeu kon vorder nie.
In verskeie stede is die openbare vervoer heeltemal verlam, en die plaaslike owerhede het ’n beroep gedoen op mense om nie hul huise te verlaat tensy dit absoluut nodig is nie.
In die streek Allgau in die Beierse Alpe het die swaar sneeuval drie sneeustortings veroorsaak. Daar word gevrees dat verskeie skiërs oorval is.
’n Weerkundige, me. Dorothea Paetzold, het aan Die Welt gesê die hoeveelheid sneeu wat op die oomblik oor die land verspreid lê is die grootste sedert die winter van 1978-’79. Bowendien is die maksimum temperatuur dikwels -10 °C of nóg kouer.
Dit was blykbaar die koudste in die dorp Funtensee in Beiere. Daar is ’n verbysterende -30,5 °C gemeet.
Vir môre word opnuut ’n yslike sneeustorm voorspel.
In België berig De Standaard dat die ooste van die land swaar getref is.
Die pad tussen Luik en Luxemburg was die naweek heeltemal onrybaar, en tientalle motoriste is vasgevang.
- Die Burger