Suid-Korea beveel studente om te slaap, nie leer nie
2011-09-26 17:01
Seoel – Die regering in Suid-Korea het begin om laatnag-patrollies die strate in te stuur met die sending: Vind studente wat na 22:00 studeer en keer hulle.
In dié Asiese land het laatnag-studiesessies en akademies vir studiebegeleiding glo ‘n plaag geword en amptenare het begin stappe neem.
Die staat beloon selfs burgers wat oortreders rapporteer.
Die land se optrede teen die sogenaamde hagwon-akademies is deel van ‘n groot stryd teen die land se kultuur van opvoedkundige masochisme, berig Time.
In Suid-Korea is slegs die uiterste beste punte op skool- en universiteitsvlak aanvaarbaar vir sukses in die wêreld van werk, lui die artikel.
Op nasionale vlak verander politici toetsstelsels en toelatingsvereistes vir universiteite om sagter eienskappe soos kreatiwiteit te beloon met die doel om studente se stresvlakke te verlaag.
“’n Eenvormige kurrikulum wat slegs op toelating tot universiteite fokus, is nie aanvaarbaar nie,” het die president, Lee Myung-Bak, tydens sy inswering in 2008 gesê.
– Lees meer hier.
– Volg Nuus24 op Twitter.