Suid-Afrikaner in Brittanje vermis
2010-03-13 04:57
Kaapstad – Britse polisie is opsoek na ‘n man wat al vir meer as ‘n week vermis word, berig News24.
Donovan van Lill, ‘n populêre 29-jarige gym-instrukteur en rugby-speler, is verlede week Woensdag laas gesien.
Sy vriende het ‘n Facebook-blad geskep om die soektog by te staan.
Hulle het ook honderde plakkate van Donovan in Wiltshire en die naburige dorpe gehang.
Volgens die Facebook-blad, het Donovan verlede Donderdag nie opgedaag vir werk nie, wat “teenstrydig is met sy karakter”.
Craig Duckworth, ‘n vriend van Van Lill, het aan News24 gesê dat Donovan niks by hom gehad het toe hy weggeraak het nie, nie sy selfoon, beursie òf paspoort nie.
“Dis snaaks, want as jy weghardloop, sal jy mos ten minste jou beursie saamvat,” het Craig gesê.
Donovan het beide ‘n Britse én Suid-Afrikaanse paspoort en woon al die afgelope vyf jaar in Brittanje.
Die polisie het ook intussen met sy Slovakiese vriendin, wat in Egipte was toe hy vermis geraak het, oor die saak uitgevra.
Sy ma, wat in Durban woon, wou glad nie met die media praat nie.
– News24