Strenger sanksies kom dalk teen Iran

2012-10-15 11:51

Luxembourg – Brittanje, Duitsland en Frankryk verwag dat die Europese Unie strenger sanksies teen Iran gaan goedkeur om die ontwikkeling van kernwapens in die land te verhoed.

William Hague, Britse minister van buitelandse sake, het Maandag, voor 'n vergadering van EU-ministers, gesê nuwe sanksies sal 'n "teken wees van ons besluit in die Europese Unie om die druk te verskerp".

Hague het gesê die druk sal "oor die komende maande aanhou toeneem, tensy onderhandelings suksesvol is. Ons bly natuurlik hoopvol vir die sukses van die onderhandelings".

Die Franse en Duitse ministers van buitelandse sake het soortgelyke oproepe gedoen, maar nie uitgebrei oor die stappe wat hulle oorweeg nie.

Die Verenigde State en sy bondgenote beskuldig Iran daarvan dat hy in die geheim kernwapens ontwikkel. Tehran ontken die bewering.

– Volg Nuus24 op Twitter

- Sapa - AP