Storm woed oor nuwe wet in Ierland
2010-01-11 09:31
Salette Cloete en AFP
Johannesburg - Dit sê baie van ’n gemeenskap as godslastering toegelaat word, sê ds. Jannie Pelser van die NG kerk Rant-en-Dal.
Pelser het gereageer op die instelling van ’n nuwe Ierse wet wat godslastering onwettig maak.
Oortreders van die wet, wat op 1 Januarie in werking getree het, kan groot boetes verwag.
Pelser glo geen wet kan mense se gewetes berispe nie. Hy sê as samelewing het mense hul respek vir God verloor.
Prof. George Claassen van Skepties Suid-Afrika sê die instelling van die wet is ’n “groot terugwaartse stap vir Ierland”.
Hy het die grootste respek vir die Christendom, maar Ierland moet uit die Middeleeue uitkom, sê hy.
Dr. Chris McEvoy van Kaapstad, ’n ateïs en mediese wetenskaplike, glo godslastering is nie verkeerd nie en mense moet vry wees om enige godsdiens, politiek of leefwyse te kan kritiseer.
In Ierland woed die storm om die nuwe wet ook in godsdienskringe.
Die groep Atheist Ireland wil die wet herroep hê, maar dit kan slegs gewysig word deur ’n referendum.
As deel van sy protes teen die wet het Atheist Ireland op sy webwerf “godslasterlike” aanhalings uit die Bybel, die Koran en van bekendes soos pous Benedictus XVI en Mark Twain gepubliseer om die “ironie” van die wet te illustreer.
- Beeld