Sterk aardbewing tref Turkye
2012-06-10 19:05
Ankara – ‘n Aardbewing wat 6.0 gemeet het, het Sondag in die suidweste van Turkye getref, het die Istanboel-gebaseerde Kandilli Observatory gesê.
Volgens die plaaslike direkteur van gesondheid was daar ses tot sewe beserings, maar geen sterftes nie.
Die aardbewing het teen 12:44 (plaaslike tyd) getref by die klein vakansie-oord Oludeniz naby die Mugla-provinsie, het die instituut gesê.
Cihan Tekin, provinsiale gesondheidsdirekteur, het gesê ses tot sewe mense is in hospitale opgeneem.
“Volgens inligting wat aan ons voorsien is, is ses tot sewe mense in hospitale opgeneem. Hulle het in paniek van balkonne of uit vensters gespring,” het hy volgens die Anatolia-nuusagentskap gesê.
“Ons het egter nog geen inligting oor enige sterftes ontvang nie,” het hy bygevoeg.
Die burgemeester van Oludeniz, Keramettin Yilmaz, het aan die NTV-televisienetwerk gesê die aardbewing het tot materiële skade gelei, maar hy het geen onmiddellike verslae oor sterftes ontvang nie.
‘n Kragtige aardbewing het die ooste van Turkye verlede jaar op 23 Oktober geruk en tot die dood van meer as 600 mense gelei. Dit is gevolg deur ‘n aardbewing van 5.6 op 12 November in dieselfde gebied, wat tot die dood van 40 mense gelei het.
In 1999 het twee sterk aardbewings in dig bevolkte en geïndustrialiseerde gebiede in die noordweste van Turkye tot die dood van 20 000 mense gelei.
- Volg Nuus24 op Twitter
- Sapa - AFP
