Stemopnemers leidraad in Poolse vlugramp
2010-04-17 11:32
Warskou. – Pole het belowe om besonderhede bekend te maak van die stemopnemers van die vliegtuig waarin die land se president en talle senior regeringsamptenare in Rusland dood is. Dit is om bespiegeling oor wie vir die ramp verantwoordelik is, te beëindig.
Pres. Lech Kaczynski van Pole, sy vrou, talle militêre leiers en senior opposisielede sou verlede Saterdag die 70ste herdenking van die slagting van 20000 Poolse offisiere deur die Sowjet-unie se geheime polisie in Katyn, Rusland, bywoon toe die vliegtuig geval het. Byna 100 mense is dood.
Russiese lugverkeersbeamptes in Smolensk het gesê hulle het die vlieëniers aangeraai om by ’n ander lughawe te land, maar hulle is geïgnoreer. Hulle het vier keer probeer land voordat die vliegtuig bome getref en neergestort het.
Sommige berigte in Pole lui Kaczynski het die vlieëniers beveel om te land sodat hulle nie die seremonie in Katyn sou misloop nie.
“Die inhoud (van die stemopnemers) sal deurslaggewend wees om die hipoteses te bewys of te weerlê. Ek sal nie die bekendmaking van die inhoud teenstaan nie, tensy dit van ’n intieme aard is,” het Andrzej Seremet, hoofaanklaer, aan die radiostasie Tok FM gesê.
Die nuusagentskap Interfax het ’n bron na aan die ondersoekspan aangehaal wat gesê het dit lyk nie of die vlieëniers onder Kaczynski se druk was nie. “Tans is daar geen bewyse dat enige van die hooggeplaaste passasiers beveel het dat die vlieëniers in Smolensk moet land nie.”
Russiese ondersoekbeamptes is besig om die twee Russies-vervaardigde stemopnemers te ontsyfer.
- Reuters