Spotprenttekenaar se aanvaller in hof
2010-01-03 07:09
Kopenhagen - 'n Somaliese man wat vermoedelik 'n verbintenis met Al Kaïda het, staan tereg op twee aanklagte van poging tot moord ná hy by die huis van die omstrede Deense spotprenttekenaar Kurt Westergaard ingebreek het.
Westergaard is die opspraakwekkende spotprenttekenaar wat Moslems woedend gehad het oor sy grafiese sketse waarin hy die spot gedryf het met die profeet Mohammed.
Die verdagte, wat twee maal deur die polisie geskiet is, het Saterdag op 'n draagbaar in 'n Deense hof verskyn. Sy gesig was bedek.
Die hof het beveel dat die man voorlopig vir vier weke aangehou moet word.
Veiligheidsmaatreëls ter beskerming van die 74-jarige Kurt Westergaard is ook verskerp, en hy is na 'n onbekende plek van veiligheid geneem.
Die verdagte, wat deur owerhede beskryf word as 'n 28-jarige Somaliese man met bande met Al-Kaïda, het na bewering laat Vrydag by Westergaard se huis ingebreek met 'n byl en 'n mes. Die huis is in Aarhus, Denemarke se tweede grootste stad, 200 km noordwes van Kopenhagen.
Jakob Scharf, hoof van Denemarke se PET-intelligensie-agentskap, het Saterdag gesê die verdagte het moontlik skielik besluit om die man aan te val.
"Dit lyk of hy alleen opgetree het, en miskien was dit 'n skielike besluit," het Scharf aan die Deense televisiekanaal TV2 gesê. Hy was nie beskikbaar vir verdere kommentaar nie.