Spotprenttekenaar in huis aangeval
2010-01-02 07:22
Kopenhagen – Die Deense polisie het Saterdag bevestig dat hulle ‘n man geskiet en in hegtenis geneem nadat hy probeer het om ‘n omstrede spotprenttekenaar te vermoor.
Die 28-jarige Somaliese man het glo Vrydag met ‘n byl in die hand by die huis van Kurt Westergaard ingebreek in die stad van Aarhus.
Westergaard is die opspraakwekkende spotprenttekenaar wat Moslems woedend gehad het oor sy grafiese sketse waarin hy die spot gedryf het met die profeet Mohammed.
Die polisie het op die verdagte geskiet en hom gewond voordat hy in hegtenis geneem is. Na bewering is die Somaliese man verbind met Al-Qaeda in Oos-Afrika.
Westergaard, wat al verskeie doodsdreigemente ontvang het sedert sy opspraakwekkende tekeninge sowat vyf jaar gelede gepubliseer is, was tuis saam met sy vyfjarige kleindogter toe die aanval plaasgevind het.
“Ons het onsself in ‘n veiligheidskamer toegesluit en die polisie gekontak. Die verdagte het ‘n byl by hom gehad en probeer om die deur oop te kap,” het die 74-jarige Westergaard gesê.
Soortgelyke aanvalle:
In 2008 het Westergaard vyf maande lank op die vlug geslaan nadat hy met die dood gedreig is omdat hy die profeet Mohammed as ’n terroris met ’n bom en brandende lont in sy tulband geteken het.
In ’n onderhoud met die Duitse oggendblad Die Welt het hy vertel dat hy meestal nie meer as een nag op ’n plek slaap nie.
Wanneer hy kantoor toe gaan ry hy nooit dieselfde roete nie.
“As ek nie my selfoon beantwoord nie, dink almal onmiddellik ek is dood.”
Die Deense polisie bewaak hom dag en nag omdat hulle inligting het dat Moslem-ekstremiste hom ter dood veroordeel het.
- Sapa, AFP