Spanje neem EU-presidentskap oor
2010-01-01 14:10
Stockholm, Swede - Swede het Donderdag om middernag die roterende presidentskap van die Europese Unie aan Spanje oorhandig, en so 'n einde gebring aan sy ses maande lange periode aan die stuur van dié groep van 27 lande.
Die Spaanse EU-presidentskap sal die eerste wees onder die Verdrag van Lissabon, wat op 1 Desember van krag geword het.
Dié verdrag maak voorsiening vir 'n voltydse voorsitter van die EU-raad, en dié amp sal vir die eerste keer beklee word deur die vorige premier van België, Herman Van Rompuy.
Die probleem van klimaatsverandering en die aanvaarding van die Verdrag van Lissabon – wat daarop gemik is om die besluitnemingsproses in die EU te vergemaklik – was volgens die Sweedse premier, Fredrik Reinfeldt, die moeilikste kwessies tydens Swede se presidentskap.
– SAPA