Spaanse soldate sterf in Afganistan

2011-06-26 20:00

Madrid – Twee Spaanse soldate het in Afganistan gesterf en nóg drie is beseer toe hul gepantserde voertuig ‘n tuisgemaakte ploftoestel getref het, het die Spaanse ministerie van verdediging Sondag gesê.

Die soldate was op ‘n verkenningspatrollie toe die ontploffing sowat 20 kilometer noord van die stad Qala i Naw gebeur het.

Die beseerdes is per helikopter na ‘n hospitaal in die dorp Bala Murghab vervoer. Hulle het beenbreuke en ander beserings opgedoen.

Spanje het sowat 1 500 troepe wat in die Navo-geleide Veiligheidsbystandmag in Afganistan dien.

Daar is sowat 130 000 Navo-geleide troepe wat in Afganistan veg.

‘n Beperkte onttrekking van buitelandse troepe sal na verwagting in Julie begin voor ‘n beplande oorplasing van verantwoordelikheid aan Afgaanse veiligheidsmagte. Dié proses sal na verwagting teen 2014 voltooid wees.

- Volg Nuus24 op Twitter
 

- Sapa - AFP