Somaliese vrou tronk toe oor verkragting-bewerings

2013-02-05 16:39

Mogadisjoe – ‘n Vrou wat beweer het dat Somaliese sekerheidspersoneel haar verkrag het, is vir ‘n jaar tronk toe gestuur omdat dié aantygings glo onwaar was.

Die joernalis wat met haar ‘n onderhoud gevoer het oor haar beweerde verkragting, maar nie die beweerde misdaad gerapporteer het nie, is ook deur ‘n regter in Mogadisjoe skuldig bevind en 'n jaar tronkstraf opgelê, het BBC News en AFP berig.

Die vrou se man en twee ander mense wat die naweek in verband met die saak in hegtenis geneem is, is weer vrygelaat. Die vrou self sal eers haars vonnis begin uitdien wanneer sy nie meer haar baba borsvoed nie.

Die regter het gesê die hof het weens die afwesigheid van enige mediese bewyse dat die vrou verkrag is, besluit dat haar bewerings onwaar is.

Verkragtings is volop in Mogadisjoe, waar tienduisende mense wat in 2011 van ‘n hongersnood gevlug het, in kampe met swak sekuriteit woon.

Regeringsmagte word gereeld by gewelddadige aanvalle betrek.

– Volg Nuus24 op Twitter