Somaliese premier se kantoor geteiken
2013-01-29 10:21
Mogadisjoe – Minstens ses mense is dood nadat ‘n selfmoordbomaanvaller Dinsdag op ‘n groep sekuriteitsbeamptes buite die kantoor van Somalië se premier toegeslaan het, het weermagbeamptes gesê.
“Ek het die lyke van ses mense gesien en verskeie ander is beseer,” het Abdukadir Ali, ‘n Somaliese militêre beampte wat naby die toneel in Mogadisjoe was, gesê.
Die meeste van die oorledenes en beseerdes was soldate of polisielede.
“Die aanvaller het naby ‘n grensmuur in die gebied gesit en het homself by ‘n groep sekuriteitsbeamptes opgeblaas,” het Ali bygevoeg.
“Daar was ‘n chaos, rook en stukke mensvleis.”
Abdi Farah Shirdon Said, die premier, was in sy kantoor ten tyde van die aanval, het beamptes gesê. Hy is nie in die aanval beseer nie.
Die gebied is deur sekuriteitsmagte afgesper... ek het verskeie dooie soldate gesien en ander wat beseer is, is na ‘n hospitaal geneem,” het Mohamed Hussein, ‘n getuie, gesê.
Geen groep het onmiddellik verantwoordelikheid vir die aanval aanvaar nie, maar die Al-Shabaab-rebelle, wat bande met Al-Kaïda het, het al ‘n rits aanvalle in die hoofstad uitgevoer.
– Volg Nuus24 op Twitter
- Sapa - AFP
