Soldaat ondersoek ná nog 'n voorval op Okinawa

2012-11-02 10:18

Okinawa – Japan het 'n formele klag gelê ná nog 'n voorval op die eiland Okinawa waar 'n lid van die Amerikaanse weermag betrokke was, het die BBC Vrydag berig.

Die plaaslike media het berig dat 'n ongeïdentifiseerde 24-jarige soldaat van die Kadena-lugmagbasis 'n woonstel bo 'n kroeg op die derde verdieping binnegegaan het en 'n 13-jarige seun aangerand het.

Hy het ook 'n televisiestel gebreek, het die media berig.

Die soldaat, wat glo voor die voorval reeds by die kroeg aggresief was, het toe by die venster uitgespring en moes na die hospitaal geneem word.

Die polisie het gesê hulle het 'n oproep van die kroegeienaar ontvang wat gesê het 'n lid van die Amerikaanse weermag was dronk en besig om moeilikheid te maak.

Met die polisie se aankoms het hulle die man gevind waar hy op die grond lê nadat hy by die venster uitgespring het.

Amerika het 26 000 soldate wat op Okinawa gestasioneer is en misdade wat lede van die weermag betrek is tans 'n bron van spanning tussen Japan en Amerika.

Twee Amerikaanse vlootsoldate is verlede maand op die eiland in hegtenis geneem vir die beweerde verkragting van 'n Japanse vrou.

Die bende-verkragting in 1995 van 'n 12-jarige meisie deur drie Amerikaanse soldate het destyds tot woede en verontwaardiging op die eiland gelei.

– Volg Nuus24 op Twitter.