Soldaat kraam by Navo-basis in Afganistan
2012-09-20 07:15
Londen – 'n Britse soldaat wat in Afganistan diens doen, het by die Navo-basis waar sy ontplooi is, die lewe geskenk aan 'n babaseun, het die ministerie van verdediging Woensdag gesê.
Die baba is Dinsdag by die basis in die provinsie Helmand, bekend as Kamp Bastion, gebore. Volgens die vrou het sy nie geweet sy is swanger nie, het die Britse media berig.
Kamp Bastion was verlede week die teiken van aanvalle deur die Taliban.
Twee Amerikaanse seesoldate is dood en ses stralers is vernietig toe die aanvallers die basis Vrydag bestorm het. Die Taliban-vegters in Amerikaanse weermaguniforms was gewapen met selfmoordbomtoestelle, wapens en vuurpyle.
Die ma en baba is albei in 'n stabiele toestand. 'n Mediese span van 'n hospitaal in Oxford in Engeland sal hulle besoek voor hulle huis toe geneem word.
'n Woordvoerder van die ministerie van verdediging het die geboorte bevestig.
"Ma en baba is albei in 'n stabiele toestand in die hospitaal en ontvang die beste moontlike sorg.
"'n Pediatriese span sal binne die volgende paar dae in die land aankom om geskikte sorg vir ma en baba te bied op 'n vlug huis toe."
Hy het verder gesê die ministerie was nie bewus van die vrou se swangerskap nie.
"Dit is nie weermagbeleid om vroulike soldate te laat diens doen as hulle swanger is nie."
Volgens Brittanje se Daily Mail het die vrou, wat afkomstig is van Fidji, eers uitgevind sy is swanger toe sy mediese beamptes besoek het en van erge maagpyne gekla het. Die baba is vyf weke te vroeg gebore.
– Volg Nuus24 op Twitter
- Sapa - AFP
