Soldaat in hof oor WikiLeaks
2011-12-17 09:55
Fort Meade – ’n Amerikaanse weermagintelligensie-ontleder wat daarvan beskuldig word dat hy duisende geklassifiseerde dokumente aan WikiLeaks verskaf het, het Vrydag vir die eerste keer in die hof hier verskyn.
Off. Bradley Manning het na bewering ’n groot aantal Amerikaanse dokumente aan die klikwebwerf verskaf. Een van die aanklagte is dat hy bystand aan die vyand verleen het.
WikiLeaks het eindelik honderdduisende sensitiewe diplomatieke dokumente met die openhartige menings van Amerikaanse amptenare en hul bondgenote gepubliseer.
Veiligheidsmaatreëls by die weermagbasis hier is verskerp en daar was ’n groep betogers.
Aanklaers wil bewys dat daar genoeg bewyse is om Manning op 22 strafregtelike aanklagte in ’n krygshof te verhoor.
Indien Manning skuldig bevind word, kan hy tot lewenslange tronkstraf gevonnis word, sy rang en alle vergoeding en toelae in die weermag verloor en oneervol ontslaan word.
Hy kan die doodstraf opgelê word op die aanklag dat hy die vyand bygestaan het, wat die ernstigste aanklag is, maar die weermag gaan nie vir die doodstraf vra nie.
Die Britse hoër hof het gesê hy het toestemming aan Julian Assange, stigter van WikiLeaks, gegee om teen sy uitlewering aan Swede op seksuele aanklagte te appelleer.
- Reuters