Sneeustorm ruk dele van VSA tot stilstand
2013-02-09 11:40
New York – Duisende vlugte is vertraag en verskeie paaie is gesluit nadat 'n sneeustorm die noordoostelike Verenigde State getref het.
Duisende mense is sonder elektrisiteit gelaat en meer as 200 000 kragonderbrekings is in Massachusetts, meer as 100 000 in Rhode Island en 30 000 in Connecticut aangemeld.
Weervoorspellers het gewaarsku dat sowat 60 cm sneeu oor die grootste gedeelte van Boston verwag word, en in sommige gebiede word tot 76 cm sneeu verwag. In New York word 30 cm sneeu in sommige gebiede verwag, terwyl swaar sneeuneerslae in Connecticut en Maine verwag word.
Winde het Vrydagmiddag 'n spoed van tussen 56 tot 64 km/h bereik en weervoorspellers verwag later winde van tot 97 km/h.
Die goeweneurs van Massachusetts, Rhode Island, Connecticut, New York en Maine het reeds noodtoestand afgekondig.
Deval Patrick, goeweneur van Massachusetts, het motoriste sedert Vrydagmiddag verbied om te reis, terwyl Dannel Malloy, goeweneur van Connecticut, die staat se hoofweë vir alle voertuie, uitsluitend nooddiensvoertuie, gesluit het.
Teen Vrydagaand is treindienste tussen New York-stad en Westchester County, en Long Island en Connecticut opgeskort.
In baie gevalle het owerhede sommige regeringswerkers beveel om tuis te bly en privaat werkgewers gevra om dieselfde te doen. Inwoners is ook gevra om voor te berei vir kragonderbrekings.
– Volg Nuus24 op Twitter
- Reuters
