Sneeu begrawe Amerika
2009-12-10 11:44
Washington - 'n Man is dood en talle motoriste is gestrand ná 'n reuse-storm die sentrale deel van Amerika in gevaarlike ys en sneeu begrawe het.
Die man is buite agter die poskantoor in Yale, Iowa gevind en is onderweg na die hospitaal dood.
Pat Slattery, 'n woordvoerder van die nasionale weerdiens, het gesê honderde vlugte is gekanselleer, skole is gesluit en swaar reën het gevaarlike toestande in sekere dele veroorsaak.
Waarskuwings vir die moontlikheid van 'n sneeustorm is ook uitgereik.
Beamptes het mense gevra om by die huis te bly as hulle kan en komberse, water en kos te pak as hulle iewers heen wil gaan.
Wisconsin het 'n noodtoestand verklaar en regeringskantore gesluit.
– AFP