Slaperige vlieënier veroorsaak ramp
2010-11-17 12:21
Nieu-Delhi – ‘n Slaperige vlieënier wat die aanloopbaan teen die verkeerde hoek genader het, is te blameer vir die Indiese vliegramp waartydens sowat 158 mense gesterf het.
Dié bevinding is gemaak nadat ‘n ondersoek van stapel gestuur is na afloop van die vliegramp in Mei vanjaar.
Volgens die bevindinge van die ondersoek was die vlieënier van die Air India-vliegtuig, Zlatko Glusica, aan die slaap vir meeste van die drie uur lange vlug vanaf Doebai.
Die Hindustan Times het Woensdag berig dat Glusica “gedisoriënteerd” was tydens die landing weens die feit dat hy die hele tyd geslaap het.
Die Air India-vliegtuig het by die Mangalore-lughawe die aanloopbaan gemis en in ‘n sloot ingeval voordat dit aan die brand geslaan het. Slegs agt mense het dié ramp oorleef.
Volg Nuus24 op Twitter.
- Sapa - AFP