Slapende vrou op bankie aan die brand gesteek

2012-12-28 08:52

Los Angeles – 'n Man is in Los Angeles in hegtenis geneem nadat hy glo 'n 67-jarige vrou aan die brand gesteek het terwyl sy op 'n bankie geslaap het.

Owerhede het gesê die man, wat in sy 20's is, is Donderdag in hegtenis geneem, maar sy naam is nie onmiddellik bekend gemaak nie.

Die polisie het gesê die aanval het kort ná middernag buite 'n apteek plaasgevind. 'n Oogetuie het gesê hy het gesien hoe die man by die apteek uitkom en iets oor die vrou uitgooi voor hy haar aan die brand gesteek het.

Die vrou, wat vermoedelik haweloos was, is in 'n kritieke toestand in die hospitaal.

Verlede week is 'n 55-jarige man aan die brand gesteek terwyl hy buite 'n winkel in suidelike Los Angeles geslaap het. Niemand is in verband met dié voorval in hegtenis geneem nie.
      
– Volg Nuus24 op Twitter

- Sapa - AP