Slagoffers dagvaar VSA-weermag vir R6 miljard
2011-11-11 09:05
Washington – Altesaam 83 slagoffers en familielede van die ergste skietvoorval wat nog by ‘n militêre instansie in die VSA plaasgevind het eis $750 miljoen (R6 miljard) skadevergoeding van die weermag.
Hulle is van mening dat nalatigheid daartoe gelei het dat die psigiater, maj. Nidal Hasan, ‘n aanval geloods het.
Die administratiewe eise wat verlede week ingedien is, sê die regering het duidelike waarskuwings gehad dat Hasan, wat geskeduleer is om in Maart verhoor te word, ‘n groot gevaar was vir die soldate en burgers by Fort Hood, Texas.
Die regering het nie net die bedreiging geïgnoreer nie, maar het Hasan selfs vyf maande voor die massamoord na majoor bevorder, het die administratiewe eise teen die departement van verdediging, die departement van justisie en die FBI getoon.
Dertien soldate en burgerlikes is dood en tientalle soldate en burgerlikes is beseer in die skietvoorval op 5 November 2009.
Vier-en-vyftig van die vermoorde soldate se familielede het eise ingestel.
Een polisiebeampte en nege van die beseerde soldate het eise ingestel, tesame met 19 van hulle familielede.
– Volg Nuus24 op Twitter
- AP