Skudding tref Bali; talle beseer
2011-10-13 12:36
Djakarta – Minstens 50 mense is beseer toe ‘n sterk aardbewing Indonesië se gewilde eiland Bali getref het.
Daar word berig dat talle mense beendere gebreek het en kopbeserings in Donderdag se skudding opgedoen het.
Ooggetuies het aan plaaslike radio- en televisiestasies gesê dat die dakke van sommige huise ingegee het. Die mure van talle tempels langs die kus het ook verkrummel.
Die Amerikaanse geologiese opname (USGS) sê die aardbewing wat 6.0 gemeet het, het 100 km suidwes van die eiland omtrent 60 km onder die seebodem ontstaan.
Alhoewel die skudding nie sterk genoeg was om ‘n tsoenami te veroorsaak nie, kon die aardbewing op die naburige eilande Java en Lombok – wat honderde kilometers ver is – gevoel word.
“Dit het my van my motorfiets af gegooi,” het Miftahul Chusna, ‘n paniekbevange inwoner van Bali, gesê.
Candy Juliani, ‘n skakelbeampte vir die Sanur Beach Hotel, sê inwoners het uit die gebou gehardloop.
“Ons het spesiale noodroetes vir hierdie tipe situasies, maar almal was so bang. Hulle het dit net geïgnoreer,” het Juliani vertel.
Wayan Sudanti, ‘n hospitaalwoordvoerder, sê minstens 50 mense is beseer. Hy sê talle mense het snywonde, gebreekte beendere en kopbeserings opgedoen.
Drie mense is in ‘n kritieke toestand.
Volg Nuus24 op Twitter
- Sapa - AP