Skrywer vas ná hy regering kritiseer

2010-04-27 05:03

Beijing - 'n Tibettaanse skrywer wat vir 'n Chinese uitgewery gewerk het, is in hegtenis geneem nadat hy die regering se reaksie oor verlede maand se aardbewing gekritiseer het.

Volgens talle webtuistes wat hulself aan Tibettaanse kultuur toewy, is Tagyal, beter bekend as Zhogs Dung, Vrydag by sy werk in Xining in hegtenis geneem.

Die polisie het glo die volgende dag sy huisrekenaar verwyder.

Volgens die webtuiste van High Peaks Pure Earth, is Zhogs Dung in hegtenis geneem nadat hy 'n brief geteken het wat donasies vir die slagoffers van 14 April se dodelike aardbewing vra.

In dié brief het skrywers sekere aspekte van die Chinese regering gekritiseer - veral hul reddingspogings en beperkte individuele pogings om slagoffers te help.

Meer as 2 200 mense is dood, 12 000 beseer en duisende mense haweloos gelaat nadat 'n 6.9-grootte aardbewing Tibet geruk het.

- Sapa-AFP