Skotland: Nog 'n stapper sterf ná sneeustorting

2013-02-15 12:42

Londen – ‘n Derde bergklimmer is dood ná ‘n sneeustorting in die Skotse hooglande wat Donderdag ook die lewe van twee ander stappers geëis het, het die polisie Vrydag gesê.

Die man het aan sy beserings beswyk ná die sneeustorting in die Cairngorms Donderdag die lewe van ‘n ander man en vrou geëis het.

Die gebied is gewild onder stappers en drie van Skotland se vyf ski-oorde is hier geleë.

“Hierdie is nog ‘n moeilike en tragiese voorbeeld van die gevare op ons berge,” het Alex Salmond, die Skotse premier, gesê.

“Dit is een van die mooiste plekke op aarde, maar die berge kan ook inherent gevaarlik wees met veranderlike toestande.”

Dit was die derde ernstige sneeustorting wat dié jaar in die Skotse hooglande plaasgevind het.

– Volg Nuus24 op Twitter
 

- Sapa - AFP