Skote klap weer in Damaskus, Aleppo

2012-11-05 13:37

Damaskus – Swaar gevegte het weer Maandagoggend tussen Siriese soldate en rebelle in Damaskus en Aleppo uitgebreek, het inwoners en ‘n menseregte-groep gesê.

Gevegte het al Sondagaand in Damaskus uitgebreek en is vroeg Maandagoggend hervat, het die Siriese Waarnemers vir Menseregte gesê.

“Daar was verskeie gekoördineerde aanvalle op militêre bassise in die gebied gewees. Palestynse vegters het ook by albei kante aangesluit,” het Rami Abdel Rahman, die groep se direkteur, gesê.

Hy het bygevoeg dat baie inwoners van die stede na vlugtelingkampe gevlug het om veilig te wees.

‘n Apteker in Aleppo het gesê dat die aanvalle die ergste was wat hy nog tydens die opstande beleef het.

“Dit is nou al amper ‘n week wat ons elke aand vir ons lewens vrees. Ons hoor alles; skietgevegte en ontploffings. Ons is so bang dat ons die kinders uit hul kamer na die middel van die huis geskuif het,” het die 37-jarige apteker gesê.

“Van my bure dink daaraan om te vlug omdat die situasie net erger raak. Die geraas raak elke dag net harder.”

– Volg Nuus24 op Twitter
 

- Sapa - AFP