Skoolseuns vas wat dubbeldekker-bus 'steel'

2012-05-02 15:48

HongKong – Twee Hongkongse skoolseuns is gearresteer nadat hulle 'n dubbeldekker-bus van 'n busstasie af bestuur het, het 'n nuusberig Woensdag bekendgemaak.

Die twee, onderskeidelik 12 en 14 jaar oud, is deur 'n werker van die busmaatskappy gesien terwyl die bus Dinsdag om 02:00 (plaaslike tyd) besig was om stadig uit die parkeerterrein te ry, het die Hong Kong Standard berig.

Volgens die polisie kon die werknemer van die Kowloon Motor Busmaatskappy daarin slaag om die seuns te oorreed om stil te hou.

Die seuns, wat net onder hul vanne as Wong en Ng geïdentifiseer is, staan tereg op aanklagte dat hulle 'n voertuig gesteel het en sonder 'n geldige rybewys bestuur het. Hulle is op borgtog vrygelaat.

Die busmaatskappy is nou besig met 'n ondersoek om vas te stel hoe die seuns dit reggekry het om in die bus te klim en die enjin aan te skakel.

– Volg Nuus24 op Twitter.

- Sapa-DPA