Britse skoliere geleer om hande af te kap
2010-11-22 04:56
Londen - Leerlinge by Islamitiese skole oor Brittanje heen word geleer hoe om ‘n misdadiger se hand af te kap en dat Jode saamsweer om die wêreld oor te neem, het ‘n ondersoek deur die BBC Maandag onthul.
Tot 5 000 leerlinge tussen ses en 18 jaar oud word strawwe van “Sharia”-wette geleer met “naweek-skool”-handboeke wat sê dié wat nie in Islam glo nie, sal aan “hellevuur” in die dood onderwerp word.
‘n Handboek vir 15-jariges lui: “Vir diewe sal hul hande afgekap word vir ‘n eerste oortreding, en ‘n voet vir die tweede oortreding.”
“Die gespesifiseerde straf vir die dief is om sy regterhand by die pols af te sny. Dit word dan toegeskroei om te voorkom dat hy doodbloei,” is bygevoeg.
Jong leerlinge word ook gewaarsku dat deelnemers aan homoseksuele dade met die dood gestraf kan word deur steniging, verkoling of deur van ‘n afgrond gegooi te word.
Daar word ook geleer dat die “hoofdoel” van die Jode is om “beheer oor die wêreld en dié se hulpbronne te hê".
Die skole is deel van die “Saoedi-Studenteklubs en Skole in die VK en Ierland”-organisasie. Volgens die BBC se ondersoek word een van die skole in Londen deur die regering van Saoedi-Arabië besit.
Die minister van onderwys, Michael Gove, het aan die BBC gesê: “Ek het geen begeerte om in te meng by die besluite wat die Saoedi-regering maak in hul eie onderwysstelsels nie.
“Maar ek maak dit duidelik dat ons nie enige anti-semitiese materiaal, van watter aard ookal, in Britse skole kan toelaat nie. Ofsted (Brittanje se waghond vir opvoeding) sal binnekort aan my rapporteer.”
- Sapa - AFP