Skip met olie tref rif naby NS
2011-10-05 15:54
Wellington – ‘n Groot vragskip het Woensdag ‘n rif naby Nieu-Seeland se Noord-Eiland getref en ‘n “ligte skynsel olie” is vrygestel, maar dit word nie gesien as ‘n groot bedreiging vir die omgewing nie, het die land se maritieme agentskap gesê.
Die vragskip van 47 000 ton, Rena, het vroegoggend ‘n rif sowat 22 km van die kus van Tauranga getref, het Maritime New Zealand gesê.
Daar is berig dat geen van die 25 bemanningslede op die Liberiese skip beseer is nie.
Volgens die agentskap het moniteringsvlugte vroeg Woensdagoggend gevind dat van die enjin-olie in die see uitgelek het, maar tenke met 1 700 ton swaar brandstofolie het geen skade gely nie.
“Alhoewel ‘n ligte skynsel van olie om die skip geïdentifiseer is, is daar vasgestel dat die hidroliese olie van die enjin is en dit skep geen merkwaardige gevaar vir die omgewing in hierdie stadium nie,” het die agentskap gesê.
“Sover ons kan vasstel, sit die skip stewig vas en is dit tans stabiel.”
‘n Span is gereed om ‘n “veiligheidsnet” om die skip te vorm, sou olie dalk begin lek, het Renny van der Velde van die agentskap gesê.
“Alhoewel die plan is om die skip te verwyder sonder om enige olie te lek, is dit belangrik om noodplanne in plek te hê indien iets dalk fout gaan,” het hy gesê.
Dit was steeds onbekend hoe die skip die rif getref het.
– Volg Nuus24 op Twitter
- AFP