Skietstilstand-ooreenkoms in Jemen bereik, weer verbreek
2011-10-25 20:00
Sanaa – ‘n Wapenstilstand-ooreenkoms in Jemen was van
korte duur toe sowat 15 mense kort daarna in gevegte gesneuwel het.
Talle mense is in Sanaa en Taez in botsings
tussen regeringsmagte en rebellemagte dood ná president Ali Abdullah Saleh ‘n
wapenstilstand aangekondig het.
Volgens mediese personeel is minstens vier
mense, onder wie ‘n sewejarige kind, ‘n vrou en ‘n polisiebeampte in Taez dood.
Inwoners van Taez het die sterftes op die
regering se onwillekeurige bombardering van woonbuurte blameer.
Die land se departement van binnelandse sake
het gesê dat vier polisiebeamptes in Taez ook hul lewens verloor het.
Volgens stamgebonde bronne in Sanaa is minstens een man dood en nege beseer toe die noordelike Al-Hasaba-woonbuurt
gebombardeer is.
Magte wat deur die invloedryke stamhoof Sjeik
Sadez al-Ahmar gelei word en wat tot dusver die pro-demokratiese beweging
ondersteun het, het vroeër tot die skietstilstand ingestem.
Die regering het aangekondig dat die
wapenstilstand-ooreenkoms onmiddellik van toepassing is, maar volgens Sjeik Sadez
al-Ahmar se broer, Sjeik Hemyar, het president Ali Abdullah Saleh se magte aangehou om Sjeik Ahmer
se wonings aan te val.
“Die regering het nie die wapenstilstand vir
een enkele sekonde gerespekteer nie,” het Sjeik Hemyar gesê.
Volg Nuus24 op Twitter.
- Sapa - AFP